Kæru félagskonur

Dr. Unnur Þorsteinsdóttir, framkvæmdastjóri hjá Íslenskri erfðagreiningu og háskólakona ársins 2022 tekur á móti félagskonum þann 17. mars nk, kl 17:00 í húsakynnum Íslenskrar erfðagreiningar að Sturlugötu 8.

Unnur mun flytja erindi um rannsóknarmódel Íslenskrar erfðagreiningar, í kjölfarið verða umræður og rannsóknaraðstaða ÍE verður skoðuð.

Unnur lauk BS-prófi í líffræði frá Háskóla Íslands árið 1984, diplómanámi í kennslufræði fyrir kennara í framhaldsskóla árið 1987 og doktorsprófi í sameindaerfðafræði frá University of British Columbia árið 1997. Á árunum 1997-2000 var hún nýdoktor við Institut de Recherches Cliniques de Montreal í Kanada. Hún hefur starfað hjá Íslenskri erfðagreiningu frá árinu 2000. Hún var verkefnastjóri í deild krabbameinsrannsókna 2000-2003 og forstöðumaður erfðarannsókna 2003-2010. Unnur hefur verið framkvæmdastjóri rannsókna Íslenskrar erfðagreiningar frá 2010 og hefur m.a. leitt rannsóknir tengdum hjarta og æðasjúkdómum, efnaskiptasjúkdómum og krabbameinum. Unnur hefur samhliða starfi sínu hjá Íslenskri erfðagreiningu gegnt stöðu rannsóknarprófessors við Læknadeild Háskóla Íslands auk þess að sitja í fjölmörgum stjórnum og nefndum. Þá hefur Unnur hlotið fjölda viðurkenninga fyrir störf sín og rannsóknir og fékk m.a. riddarakross hinnar íslensku fálkaorðu fyrir framlag á vettvangi erfðarannsókna og vísinda árið 2017.

Árið 2022 var Unnur metin sem áhrifamesta vísindakona Evrópu og sú fimmta áhrifamesta í heiminum.

Fjölmennum á þennan merka viðburð - vinsamlegast skráið þátttöku á netfangið felaghaskolakvenna@gmail.com

Gleðileg nýtt á kæru háskólakonur.

Fyrsti viðburður ársins verður á fimmtudaginn 9. janúar frá kl 12.00 til 13.00. Þá tekur lektor Listaháskólans, Kristín Eysteinsdóttir, á móti félagskonum og segir frá fjölbreyttri starfsemi skólans, helstu áskorunum og framtíðarsýn.

Kristín Eysteinsdóttir lauk meistaragráðu í leikstjórn frá Goldsmiths, University of London árið 2007 en áður hafði hún lokið BA námi í dramatúrgíu frá Árósarháskóla árið 2002. Kristín var ráðin leikhússtjóri Borgarleikhússins árið 2014 og gegndi þeirri stöðu til ársins 2020. Kristín starfaði sem prófessor og fagstjóri við sviðslistadeild Listaháskóla Íslands frá ágúst 2022 og tók við sem rektor háskólans í apríl 2023.

Samkvæmt vefsíðu Listaháskólans þá er LHÍ er skóli allra listgreina og einstakur á alþjóðavísu að því leyti að námsframboð er afar fjölbreytt en nemendur eru hlutfallslega fáir í samhengi við námsframboð. Listaháskólinn er eini háskólinn á fræðasviði lista á Íslandi og hefur því víðtæku hlutverki að gegna gagnvart landsmönnum. Skólinn starfar í alþjóðlegu umhverfi og miðar sig við þá skóla í nágrannalöndunum sem þykja skara fram úr í kennslu og miðlun þekkingar á sviðum lista.

Hittumst sem flestar þann 9. janúar í Listaháskólanum, Laugarnesvegi 91, 105 Reykjavík. Gengið er inn um aðalinngang frá neðra bílastæði.

Hægt er að skrá sig á viðburðinn með því að senda tölvupóst á felaghaskolakvenna@gmail.com.

Kæru háskólakonur

Jólafundur Félags háskólakvenna verður haldinn á Hótel Holti, fimmtudaginn 5. desember frá kl 18:00-20:00

Að venju munum við fá góða gesti  til okkar sem og njóta góðra veitinga í fallegu umhverfi.  Jólasnittur og tilheyrandi verða í boði á sanngjörnu verði.

Gestir jólafundarins í ár verða rithöfundarnir Eva Björg Ægisdóttir og Gerður Kristný Guðjónsdóttir og munu þær lesa upp úr nýútkomnum bókum sínum.

Eva Björg kom fyrst fram á sjónarsvið íslenskra lesenda árið 2018 þegar hún sigraði í samkeppninni Svartfuglinn. Bækur Evu hafa hlotið margvísleg verðlaun innanlands og utan. Marrið í stiganum vann til hinna virtu glæpasagnaverðlauna Breta, CWA Dagger og fékk einnig Thrillzone Award í Hollandi fyrir bestu fyrstu glæpasöguna. Heim fyrir myrkur hlaut Íslensku glæpasagnaverðlaunin Blóðdropann árið 2023. Bækur Evu Bjargar hafa verið þýddar á fjölmörg tungumál.

Gerður Kristný skrifar jöfnum höndum verk fyrir börn og fullorðna og hefur sent frá sér skáldsögur, ljóð og leikrit auk annars efnis. Gerður Kristný hefur hlotið margvísleg verðlaun og viðurkenningar fyrir bækur sínar.
Ljóð og smásögur Gerðar Kristnýjar hafa birst í kennslubókum fyrir grunn- og framhaldsskóla, auk þess sem ljóð hennar og smásögur eru í ýmsum safnritum og tímaritum, íslenskum sem erlendum. Bækur Gerðar Kristnýjar hafa  komið út víða um heim.

Hlökkum til að sjá ykkur sem flestar í jólastemmningu á Holtinu. Vinsamlegast skráið þátttöku með því að svara þessum tölvupósti. 

Staður: Hótel Holt, Bergstaðastræti 37.
Stund: 5. desember kl. 18:00-20:00
Skráning:felaghaskolakvenna@gmail.com

Háskólakona ársins 2023, Dr. Kristín Jónsdóttir jarðskjálftafræðingur býður félagskonum í heimsókn til Veðurstofu Íslands þann 4. nóvember nk frá kl 17:00-18:00.

Kristín mun flytja erindi um eldfjallavöktun, áskoranir og stjórnun við ólíkar aðstæður.

Í kjölfar erindis verða umræður og létt spjall

Vinsamlegast staðfestið mætingu með því að senda tölvupóst á netfangið felaghaskolakvenna@gmail.com

Hlökkum til þess að sjá ykkur sem flestar

Þann 26. september næstkomandi kl: 11:30-13:00 er boðað til hádegisfundar á Hótel Holti þar sem Margrét Jónsdóttir Njarðvík, spænskufræðingur og rektor Háskólans á Bifröst sýnir á sér nýja hlið.

Njótum þess að eiga góða hádegisstund saman á Hótel Holti í góðra kvenna hópi. Félagskonur eiga þess kost að kaupa hádegisverð frá eldhúsi Hótel Holts á sanngjörnu verði.

Vinsamlegast skráið þátttöku á netfangið felaghaskolakvenna@gmail.com

Hlökkum til þess að sjá ykkur sem flestar!

Stjórn Félags háskólakvenna boðar til aðalfundar félagsins, miðvikudaginn 5. júní 2024 kl. 17.00 – 18.00. Fundurinn verður haldinn á Hótel Holti.

Óskað er eftir framboðum til stjórnar og skulu þau berast eigi síðar en 29. maí á netfangið felaghaskolakvenna@gmail.com  þær sem bjóða sig fram til stjórnar skulu vera félagskonur, hafa greitt félagsgjöld og skulu láta ferilskrá fylgja með framboði.

Dagskrá

1. Kosning fundastjóra og ritara

2. Greint frá störfum félagsins á liðnu starfsári

3. Stjórn leggur fram endurskoðaða reikninga félagsins

4. Kosning stjórnar

5. Kosning skoðunarmanns reikninga

6. Ákvörðun árgjalds

7. Önnur mál

Að loknum aðalfundarstörfum verður veittur  rannsóknastyrkur Félags háskólakvenna til háskólakonu í framhaldsnámi.

25. maí 2024

Stjórn Félags háskólakvenna

Marta María Arn­ars­dótt­ir skóla­meist­ari Hús­stjórn­ar­skól­ans tekur á móti félagskonum í pönnukökukaffi í Hússtjórnarskólanum þann 23. maí nk kl 16.

Marta María segir okkur frá starfsemi skólans, nýjungum í starfseminni og framtíðarsýn fyrir Hússtjórnarskólann.  Ánægjulegt er að segja frá því að Bandalag kvenna í Reykjavík veitti Mörtu Maríu hvatningarviðurkenningu ársins 2023  fyrir störf sín í þágu skólans.

Eftir kaffið göngum við um húsið með skólameistaranum og kynnumst starfseminni betur.

Fjölmennum og kynnum okkur starfsemi Hússtjórnunarskólans - endilega takið með ykkur vinkonu.

Vinsamlegast skráið þátttöku með því að senda tölvupóst á felaghaskolakvenna@gmail.com

Staður: Hússtjórnarskóli Reykjavíkur, Sólvallagötu 12, 101 Reykjavík
Stund: 23. maí kl 16-17:30
Verð: 3.500 kr fyrir pönnukökur og kaffi (vinsamlegast athugið að skólinn er ekki með posa).

Skráning:  felaghaskolakvenna@gmail.com

Stjórn Félags háskólakvenna býður til samkomu í tilefni af afhendingu viðurkenningar félagsins um háskólakonu ársins 2023. Afhendingin fer fram á Hótel Holti, Þingholti, næstkomandi fimmtudag, 21. mars kl. 18.00.

Við valið á háskólakonu ársins er horft til þess til viðbótar við að viðurkenningarhafi hafi háskólagráðu að framlag háskólakonu ársins til samfélagsins þyki skara fram úr, að hún sé brautryðjandi á sínu fagsviði og að hún sé góð fyrirmynd fyrir aðrar háskólakonur.

Tilgangurinn með viðurkenningunni er að vekja athygli á fjölbreyttum starfsvettvangi háskólakvenna, beina kastljósinu að störfum þeirra og rannsóknum og undirstrika framlag þeirra til samfélagsins. Auk þess sem félagið vill fagna framgangi þeirra, áræðni og sérstökum árangri.

Vinsamlegast skráið þátttöku á netfang Félags háskólakvenna: felaghaskolakvenna@gmail.com

Kæru félagskonur, við hefjum nýtt ár á spennandi hádegisfundi þann 2. febrúar í samstarfi við Endurmenntun Háskóla Íslands.

Fjölmennum og sjáumst hressar!

Jólafundur Félags háskólakvenna á Hótel Holti, fimmtudaginn 23. nóvember og hefst kl. 18:00.

Að venju munum við fá góða gesti til okkar sem og njóta góðra veitinga í fallegu umhverfi.

Gestir jólafundarins í ár verða:

Sigríður Hagalín Björnsdóttir, rithöfundur og fréttamaður á RÚV. Sigríður er stúdent frá MR og nam sagnfræði og spænskar bókmenntir við HÍ og háskólann í Salamanca og blaðamennsku við Columbia-háskóla í New York. Sigríður hefur starfað sem fréttamaður við Ríkisútvarpið um árabil og m.a. verið umsjónarmaður umræðuþáttarins Silfur Egils. Fyrsta skáldsaga Sigríðar, Eyland, kom út árið 2016, og var tilnefnd til Fjöruverðlaunanna og Menningar-verðlauna DV. Skáldsagan Hamingja þessa heims, riddarasaga var tilnefnd til íslensku bókmenntaverðlaunanna árið 2022. Sigríður mun gefa okkur innsýn í verk sín og m.a. segja okkur frá tengingu þeirra við innri og ytri hamfarir. Þá mun Sigríður fjalla um hvernig efnistökin koma til hennar og hvað hún sé með í smíðum þessi misserin.

Dr. Sólveig Anna Bóasdóttir, prófessor í guðfræðilegri siðfræði við Guðfræði- og trúarbragðafræðideild HÍ. Sérsvið hennar er kristin siðfræði, femínísk siðfræði og kynlífssiðfræði. Sólveig er stúdent frá MH og útskrifaðist sem Theol. Cand. frá HÍ árið 1985. Doktorsprófi í guðfræðilegri siðfræði lauk Sólveig Anna frá Háskólanum í Uppsala í Svíþjóð árið 1998. Eftir doktorspróf starfaði hún sem lektor í siðfræði við Guðfræðideild Uppsalaháskóla. Sólveig hefur starfað við Guðfræði- og trúarbragðafræðideild HÍ frá árinu 2008. Á fundinum mun Sólveig Anna segja okkur frá sérsviðum sínum og m.a. tengja boðskap jólanna við feminísk siðfræði.

Hlökkum til að sjá ykkur sem flestar og endilega takið með ykkur vinkonu.

Staður: Hótel Holt, Bergstaðastræti 37.

Stund: 23. nóvember kl. 18:00-20:00

Skráning: felaghaskolakvenna@gmail.com

Kæru félagskonur

þann 24. október kl. 17 - á sjálfan Kvennafrídaginn mun Dr Guðfinna Sesselja Bjarnadóttir taka á móti félagskonum í Opna háskólanum í HR og segja okkur frá Magnavita náminu.

Tilgangur og markmið Magnavita námsins er að stuðla að fjölgun spennandi og heilbrigðra æviára með því að auka hreysti, virkni og félagsleg tengsl. Guðfinna mun segja okkur frá tilurð námsins og mikilvægi þess að fjárfesta í eigin framtíð og uppgötva nýjar leiðir til að fjölga spennandi og heilbrigðum æviárum.

Vinsamlegast staðfestið mætingu með því að senda skráningu á felaghaskolakvenna@gmail.com

Hlökkum til þess að sjá ykkur sem flestar!

Stjórnin.

Sjá nánar á https://magnavita.is/

Þann 20. febrúar nk kl: 16 mun Áslaug Arna Sigurbjörnsdóttir háskóla-, iðnaðar- og nýsköpunarráðherra tilkynna hver hefur verið valin háskólakona ársins 2022. 

Athöfnin fer fram í hátíðarsal Háskóla Íslands í aðalbyggingu skólans.

Við hvetjum félagskonur til þess að mæta og endilega bjóðið með ykkur vinkonu(m). Í boði verða léttar veitingar.

Vinsamlegast skráið þátttöku til felaghaskolakvenna@gmail.com

Jólafundur Félags háskólakvenna verður haldinn á Hótel Holti 30. nóvember nk. frá kl 17-19.

Heiðursgestur kvöldsins verður Yrsa Sigurðardóttir, rithöfundur sem mun lesa upp úr væntanlegri bók sinni. Léttar veitingar með jólaívafi verða í boði.

Takið daginn frá.

Miðvikudaginn 21. september kl. 16.30 - 18.00 mun forseti borgarstjórnar Þórdís Lóa Þórhallsdóttir bjóða félagskonum í móttöku í Ráðhúsi Reykjavíkur í sal á þriðju hæð ráðhússins sem kallast Tjarnarbúð.

Þórdís Lóa mun kynna fyrir okkur helstu verkefni borgarstjórnar í nútíð og framtíð og ræða störf sín sem forseti borgarstjórnar auk þess sem okkur gefst kostur á að skoða Ráðhús Reykjavíkur, sem setur sterkan svip á miðbæ Reykjavíkur og svæðið við Tjörnina.

Vinsamlega staðfestið mætingu á viðburðinn eigi síðar en mánudaginn 19. september með því að senda tölvupóst á Guðmundu Smáradóttur ritara FHK á netfangið gudmunda@lbhi.is.

Stjórn Félags háskólakvenna boðar hér með til aðalfundar félagsins föstudaginn 13. maí kl. 16.30. Fundurinn verður haldinn á Hótel Holti.

Dagskrá:

1. Kosning fundarstjóra og ritara.

2. Formaður félagsins gerir grein fyrir störfum félagsins á liðnu starfsári.

3. Stjórn leggur fram endurskoðaða reikninga félagsins.

4. Kosning stjórnar.

5. Kosning skoðunarmanns reikninga.

6. Ákvörðun árgjalds.

7. Önnur mál.

Að loknum aðalfundarstörfum verður veittur rannsóknarstyrkur FHK.

Reykjavík 2. maí 2022

Stjórn Félags háskólakvenna

Kæra félagskona Miðvikudaginn 23. mars nk frá kl 17-18.30 ætlum við að hittast á Hótel Holti, þar sem Geirlaug Þorvaldsdóttir fv. formaður Félags háskólakvenna mun taka vel á móti okkur.

Eliza Reid, bókahöfundur og forsetafrú mun ræða við okkur um fjölbreytileika og jafnrétti í samfélaginu og kynna bók sína „Sprakkar“. Í bókinni fjallar Eliza um margvísleg mál sem snúa að lífi og störfum kvenna á Íslandi. Við hlökkum til að sjá ykkur á Hótel Holti þar sem boðið verður upp á léttar veitingar.

Vinsamlega staðfestið mætingu á viðburðinn eigi síðar en 22. mars með því að senda tölvupóst á Guðmundu Smáradóttur ritara FHK á netfangið gudmunda@lbhi.is.

Félag háskólakvenna stendur fyrir viðburði miðvikudaginn 23. febrúar kl. 17.00 hjá Háskólanum í Reykjavík, stofu M101, þar sem nýkjörin háskólakona ársins Dr. Erna Sif Arnardóttir lektor við verkfræðideild og forstöðumaður Svefnseturs við Háskólann í Reykjavík verður með erindi. Boðið verður upp á veitingar að erindi loknu.

Dagskrá:
Ásta Dís Óladóttir formaður FHK býður félagskonur velkomnar
Erna Sif Arnardóttir flytur erindi um svefn og svefnvandamál kvenna

Um Ernu Sif Arnardóttur
Erna Sif hefur verið leiðandi vísindamaður á sviði svefnrannsókna hér á landi, m.a. sem nýdoktor og aðjúnkt við læknadeild Háskóla Íslands, sem forstöðunáttúrufræðingur við Svefndeild við Landspítala, sem klínískur ráðgjafi hjá fyrirtækinu Nox Medical og sem rannsóknasérfræðingur við verkfræðideild Háskólans í Reykjavík. Niðurstöður rannsókna hennar hafa birst í ýms­um virt­ustu tíma­rit­um heims á viðkom­andi fræðasviðum og þúsundir fræðimanna hafa vitnað í greinar hennar og rannsóknir.

Vinsamlega staðfestið mætingu á viðburðinn eigi síðar en 22. febrúar með því að senda tölvupóst á Guðmundu Smáradóttur ritara FHK á netfangið gudmunda@lbhi.is.

Val á Háskólakonu ársins 2021 verður tilkynnt fimmtudaginn 16. desember næstkomandi kl. 17.00. Vegna stöðunnar í samfélaginu er viðburðurinn í streymi á Facebook síðu félagsins og eru félagskonur hvattar til að fylgjast með þessum hátíðlega viðburði.

Þetta er í fimmta sinn sem Félag háskólakvenna heiðrar háskólakonu fyrir framlag sitt til samfélagsins. Leitað var til rektora háskólanna um tilnefningar og bárust fjölmargar ábendingar um konur sem skarað hafa fram úr á sínu fagsviði og verið öðrum góðar fyrirmyndir.

Með viðurkenningunni vill stjórn Félags háskólakvenna vekja athygli á ólíkum störfum og afrekum félagskvenna sinna svo það megi verða hvatning öðrum konum sem stunda langskólanám.

Félagskonum FHK er boðið að taka þátt í fræðslufundi Bandalags kvenna í Reykjavík sem haldinn er fimmtudaginn 28. október nk. kl. 19.30.

Vilborg Þ.K. Bergman lögfræðingur og sáttamiðlari verður með erindi sem ber hetiði Hvað er sáttamiðlun? Ákall eftir sáttamiðlun með virku úrræði á Íslandi hefur aukist jafnt og þétt síðustu ár og mun Vilborg fara yfir hvað er sáttamiðlun og hvernig nýtist sáttamiðlun best.

Aðgangur ókeypis og kaffi og konfekt á boðstólum.

Staða drengja í menntakerfinu - óháð skólastigi

Hátíðarsalur Háskóla Íslands

Félag háskólakvenna var stofnað árið 1928 með það að markmiði að hvetja og styrkja konur til mennta, að virða og berjast fyrir sameiginlegum hagsmunamálum sem snerta bætta stöðu kvenna og stúlkna.

Konur eru nú meirihluti háskólanema á Íslandi og því beinir Félag háskólakvenna sjónum sínum að stöðu drengja og ungra karlmanna í menntakerfinu á Íslandi.

Dagskrá:

Ásta Dís Óladóttir formaður Félags háskólakvenna
Tryggvi Hjaltason formaður Hugverkaráðs Samtaka iðnaðarins og starfsmaður greiningardeildar CCP
Guðrún Inga Sívertsen skólastjóri Verzlunarskóla Íslands
Anna María Gunnarsdóttir varaformaður Kennarasambands Íslands
Vilborg Einarsdóttir meðstofnandi Mentor og framkvæmdastjóri Bravo Earth

Pallborð:

Eyjólfur Guðmundsson rektor Háskólans á Akureyri
Jón Atli Benediktsson rektor Háskóla Íslands
Ragnhildur Helgadóttir rektor Háskólans í Reykjavík

Aðgangur ókeypis.

HEIMSÓKN Í BORGARLEIKHÚSIÐ
FIMMTUDAGINN 14. OKTÓBER KL. 17-19

Brynhildur Guðjónsdóttir leikhússtjóri og Alexía Björg kynningarstjóri Borgarleikhússins taka á móti Félagi háskólakvenna fimmtudaginn 14. október frá kl 17-19.

Brynhildur og Alexía Björg fjalla um starf leikhússins og spennandi leikár sem framundan er.

Tekið verður á móti hópnum í forsal Borgarleikhússins og boðið verður upp á léttar veitingar.

Takið daginn frá. Hlökkum til að sjá ykkur.

Stjórnin

Ragna Árnadóttir skrifstofustjóri Alþingis býður Félagi háskólakvenna í heimsókn á Alþingi þar sem farið verður yfir sögu þingsins auk þess sem gengið verður um Alþingishúsið sem var reist á árunum 1880-1881. Tvær viðbyggingar hafa verið reistar við húsið síðan þá, Kringlan árið 1908 og Skálinn 2002.

Ragna stýrir skrifstofu Alþingis, framkvæmdum á vegum þingsins og hefur umsjón með fjárreiðum þess og eignum í umboði forseta. Ragna var áður aðstoðarforstjóri Landsvirkjunar og gengdi stöðu dómsmálaráðherra 2009-2010.

Einungis er hægt að taka á móti 20 konum og því mikilvægt að skrá þátttöku sína á Facebook síðu félagsins á þræðinum þar sem viðburðurinn er kynntur. https://www.facebook.com/felaghaskolakvenna

Fyrstar koma, fyrstar fá.

Stjórn Félags háskólakvenna boðar hér með til aðalfundar félagsins miðvikudaginn 2. júní 2021 kl.  17.00.  Fundurinn verður haldinn í Grósku við Vatnsmýri á 1. hæð. Atkvæðisrétt hafa þeir sem greitt hafa félagsgjöld.

Dagskrá

1. Kosning fundarstjóra og ritara.

2. Stjórn félagsins gerir grein fyrir störfum félagsins.

3. Stjórn leggur fram endurskoðaða reikninga félagsins.

4. Kosning stjórnar.

5. Kosning skoðunarmanna reikninga.

6. Ákvörðun árgjalds.

7. Kosning í fastanefndir samkvæmt ákvörðun stjórnar.

8. Önnur mál.

Í framboði til stjórnar eru:

1.       Ásta Dís Óladóttir

2.       Áshildur Bragadóttir

3.       Vilborg Einarsdóttir

4.       Guðmunda Smáradóttir

5.       Margrét Kristín Sigurðardóttir

Til vara:

1.       Ruth Elfarsdóttir

Vinsamlegast tilkynnið mætingu með tölvupósti á netfangið felaghaskolakvenna@gmail.com.

Reykjavík, 24. maí 2021.

Stjórn Félags háskólakvenna

Á tímum COVID-19 ætlar Félag háskólakvenna að efna til göngu um Fógetastíginn í Gálgahrauni á Álftanesi miðvikudaginn 26. ágúst kl. 17.00. Góðir gönguskór og veðurspá sem lofar góðu.
Við virðum sóttvarnarreglur um leið og við njótum náttúrufegurðar og fróðleiks. Anna Ólafsdóttir Björnsson,
sagnfræðingur, ætlar að segja okkur frá því helsta sem á vegi okkar verður en gangan er 4,7 km og tekur um 1,5 klst.
Gangan hefst við Bessastaðakirkju þar sem afhenda á
rannsóknarstyrki félagsins en styrkina hljóta Marta Serwatco og Salvör Rafnsdóttir.
Óskað er eftir skráning á netfangið:
felaghaskolakvenna@gmail.com

AÐALFUNDARBOÐ

Stórn Félags háskólakvenna boðar hér með til aðalfundar félagsins þriðjudaginn 2. júní 2020 kl. 17.00.  Fundurinn verður haldinn í aðalbyggingu Háskóla Íslands.

Dagskrá

1.       Kosning fundarstjóra og ritara.

2.       Stjórn félagsins gerir grein fyrir störfum félagsins.

3.       Stjórn leggur fram endurskoðaða reikninga félagsins.

4.       Kosning stjórnar.

5.       Kosning skoðunarmanna reikninga.

6.       Ákvörðun árgjalds.

7.       Lagabreytingar, ef einhverjar eru.

8.       Kosning í fastanefndir samkvæmt ákvörðun stjórnar.

9.       Lagabreyting, tillaga stjórnar

10.   Önnur mál.

Stjórn leggur til eftirfarandi lagabreytingar.

Breytingartillaga á 1. gr. er að felld verði niður aðild að Bandalagi kvenna í Reykjavík. Félag háskólakvenna starfar á landsvísu og er í samstarfi við alþjóðasamtök háskólakvenna.  Stjórn telur aðild að Bandalagi kvenna í Reykjavík sé ekki lengur í takt við tíðarandann.

1.       gr. hljómar svo

Heiti félags, heimili og hlutverk

1.    gr.

Félagið heitir Félag háskólakvenna. Félagið er aðili að Alþjóðasambandi háskólakvenna (International Federation of University Women), Bandalagi kvenna í Reykjavík og Kvenréttindafélagi Íslands.

Heimili félagsins og varnarþing er í Reykjavík. Félagið er ekki rekið í hagnaðarskyni.

-------------------------------

Greinin hljóði því svo.

Félagið heitir Félag háskólakvenna. Félagið er aðili að Alþjóðasambandi háskólakvenna (GWI – Graduate Women International) og Kvenréttindafélagi Íslands.

Heimili félagsins og varnarþing er í Reykjavík. Félagið er ekki rekið í hagnaðarskyni.

Stjórn gerir breytingartillögu að 3.gr. um félagsaðild og telur tímabært að félagið sé opið öllum sem lokið hafa háskólaprófi og aðild að félaginu sé ekki bundin við búsetu á Íslandi.

Greinin er svohljóðandi.

Félagsaðild

3. gr.

Í Félagi háskólakvenna geta verið:

1. Konur búsettar á Íslandi, sem útskrifast hafa úr íslenskum eða erlendum háskólum.

2. Konur sem að loknu stúdentsprófi hafa tekið próf frá viðurkenndum sérskóla sem telst jafngilt háskólaprófi.

------------------------------------

Greinin hljóði svo;

Í Félagi háskólakvenna geta verið:

1. Háskólamenntaðir einstaklingar sem útskrifast hafa úr íslenskum eða erlendum háskólum sem hægt er að færa sönnur á með afriti af háskólaprófi.

2. Einstaklingar sem að loknu stúdentsprófi hafa tekið próf frá viðurkenndum sérskóla sem telst jafngilt háskólaprófi.

Vakin skal athygli á því að skv. lögum félagsins hafa einungis félagskonur sem greitt hafa félagsgjöld atkvæðisrétt á aðalfundi.

Reykjavík, 25. maí 2020.

Stjórn Félags háskólakvenna.

Félag háskólakvenna heimsækir Bjarkarhlíð sem er miðstöð fyrir þolendur ofbeldis fimmtudaginn 28. maí kl. 17.00. Ragna Björk Guðbrandsdóttir, teymisstjóri, tekur á móti félagskonum í húsakynnum Bjarkarhlíðar við Bústaðaveg.

Fjöldi takmarkast við 40 og því er mikilvægt að skrá sig sem fyrst í gegnum netfangið: felaghaskolakvenna@gmail.com.

Mennta- og menningarmálaráðherra býður Félagi háskólakvenna til móttöku í Ráðherrabústaðnum við Tjörnina þriðjudaginn 11. febrúar kl. 17-19.

Það fer vel á því að fyrsti fundur starfsársins verði í eina af okkar helstu menntastofnunum, Háskóla Íslands. Rektor Háskóla Íslands Jón Atli Benediktsson og aðstoðarrektor Steinunn Gestsdóttir bjóða félagskonum í heimsókn þriðjudaginn 1. október kl. 17.00 í Hátíðarsal í aðalbyggingu háskólans.

Dagskrá:
- Jón Atli Benediktsson mun segja frá starfsemi skólans og þeim metnaðarfullu markmiðum sem sett hafa verið fyrir skólann.
- Steinunn Gestsdóttir verður með áhugavert erindi um umbótaverkefni sem unnið hefur verið að til að efla framgang kvenna í háskólaumhverfinu þar sem meðal annars verður farið inn á kulnun og akademísk húsverk.

Veitingar verða í boði og því er skráning nauðsynleg.
Vinsamlega skráið ykkur á viðburðinn á Facebook síðu félagsins:

https://www.facebook.com/events/407310129927032/