Félag háskólakvenna hefur valið Háskólakonu ársins 2020. Fyrir valinu varð Hildur Guðnadóttir, tónskáld.
Þetta er í fjórða sinn sem Félag háskólakvenna, stofnað 1928, stendur fyrir vali á Háskólakonu ársins. Við valið er horft til þess að framlag Háskólakonu ársins til samfélagsins þyki skara fram úr, að hún sé brautryðjandi á sínu fagsviði og að hún sé góð fyrirmynd fyrir aðrar háskólakonur. Fjölmargar háskólakonur voru á forvalslista og er það samdóma álit stjórnar Félags háskólakvenna að Hildur Guðnadóttir uppfylli vel öll þau skilyrði sem sett eru fyrir valinu og þykir hún hafa sýnt í verki hverju það getur skilað að hafa góða menntun í farteskinu. Tilgangur þess að velja Háskólakonu ársins er að vekja athygli á fjölbreyttum starfsvettvangi háskólakvenna, beina kastljósinu að störfum þeirra og undirstrika framlag þeirra til samfélagsins. Auk þess sem félagið vill fagna framgangi þeirra, áræðni og sérstökum árangri.
Hildur Guðnadóttir, tónskáld og sellóleikari, er með BA gráðu frá Listaháskóla Íslands og framhaldsnám frá Universität der Künste í Berlín. Hildur hefur náð framúrskarandi árangri á sínu sviði og hlotið fjölmargar viðurkenningar og verðlaun fyrir tónverk sín. Hún hefur samið fjöldann allan af verkum fyrir kvikmyndir, sjónvarpsþætti, leikhús og margvísleg önnur listform. Hún hefur einnig gefið út hljómplötur með eigin verkum. Meðal fjölmargra viðurkenninga sem Hildur hefur hlotið eru Óskarsverðlaun, Golden Globe verðlaun, Grammy verðlaun, Emmy verðlaun og BAFTA verðlaun. Þá hlaut hún tilnefningar til tveggja Grammy verðlauna fyrir tónlistina í kvikmyndinni Jóker.
Hanna Lára Helgadóttir, formaður Félags háskólakvenna: „Það má með sanni segja að Hildur sé vel að þessari viðurkenningu komin. Hún hefur náð stórkostlegum árangri á sínu sviði og fáir Íslendingar sem hafa náð viðlíka árangri. Það er okkur í stjórn Félags háskólakvenna því mikill heiður að veita Hildi þessa viðurkenningu.“
Vegna COVID-19 var Hildi afhent viðurkenningin með rafrænum hætti, þ.e. hún tók á móti viðurkenningunni í Berlín þar sem hún var stödd og stjórn Félags háskólakvenna var stödd í Grósku í Vatnsmýrinni í Reykjavík.
Háskólakona ársins 2020 Hildur Guðnadóttir, tónskáld, með Golden Globe verðlaun.
Hildur Guðnadóttir, tónskáld.
Stjórn Félags háskólakvenna afhenti Hildi Guðnadóttur viðurkenninguna rafrænt, Hildur var stödd í Berlín og stjórnin í Grósku í Vatnsmýrinni, talið frá vinstri, Margrét Kristín Sigurðardóttir, ritari, Halldóra Traustadóttir, gjaldkeri, Helga Guðrún Johnson, varaformaður, Hanna Lára Helgadóttir, formaður, og Elísabet Sveinsdóttir, meðstjórnandi.
Hanna Lára Helgadóttir, formaður FHK, stödd í Grósku í Vatnsmýri og Hildur Guðnadóttir, á tölvuskjá stödd í Berlín.